अर्याम्बिकाशङ्करशारदास्तोत्रम् - भक्तानशोकान्विदधामि शीघ्र...

भक्तानशोकान्विदधामि शीघ्रमितिप्रबोधाय ततेर्जनानाम् ।
अशोकमूले विदधाति मोदात्समाधिमार्या जगदार्यमाता ॥१॥
काषायशुक्लांबरसंवृताभ्यां काङ्क्षाधिकेष्टप्रदपूजनाभ्याम् ।
कायप्रभाधूतसुधाकराभ्यां नमोनमः शङ्करशारदाभ्याम् ॥२॥
आर्यांबिकाशङ्करशारदाभ्यो निजाङ्गशोभाजितचन्द्रिकाभ्यः ।
दिगन्तसंव्याप्तयशच्छटाभ्यो नमोऽस्तु मेधाप्रतिभाप्रदाभ्यः ॥३॥
आर्यांबिकाशङ्करशारदाभ्यः प्रपन्नसंरक्षणदीक्षिताभ्यः ।
संपूरितानन्दमनोहराभ्यो नमोऽस्तु निर्व्याजदयातनुभ्यः ॥४॥
आर्यांबिकाशङ्करशारदाभ्यः पूर्णातटावासकृतादराभ्यः ।
कारुण्यसंपूरितमानसाभ्यो नमोऽस्तु कल्याणगुणालयाभ्यः ॥५॥

इति अर्याम्बिकाशङ्करशारदास्तोत्रं सम्पूर्णम्

(शृङ्गेरि श्रीजगद्गुरु श्रीसच्चिदानन्दशिवाभिनव-
नृसिंहभारतीस्वामिभिः विरचितम्)