श्रीनारदभक्तिसूत्रें - सूत्र ४२

यालागीं हरीभक्ति । भजनकीर्तनी आसक्ति । अखंड नामस्मरणाची प्रीति । साधित साधित साधावी ॥४१२॥
तेणेचि होय सर्व साध्य । अगस्य तें होय गम्य । न लभे तें होय लभ्य । ऐसें साधन वरिष्ठ ॥४१३॥
जैसें बीज आलिया हातीं । समग्र वृक्षाची होय प्राप्ति । कां उद्यान आलीया जवळी । फळां पुष्पां सुकाळ ॥४१४॥
तैसी श्रीहरि गुरुकृपा । हाचि सिध्दपंथ सोपा । अनुसरोनि चुकति खेपा । जन्म आणि मरणाच्या ॥४१५॥
यालागीं तेंच एक साधावें । ऐसें द्विवार सांगितलें स्वभावें । ब्रम्हकुमार नारददेवें । आतां पुढें अवधारा ॥४१६॥