श्रीनारदभक्तिसूत्रें - सूत्र ३०

भक्तिज्ञानासी नव्हे भेद । दोन्ही नांदती अभेद । साध्य साधनादि संबध । यथार्थ स्वरूपीं उरेना ॥३०४॥
कां जे भक्ति तेंची ज्ञान । ज्ञानेचि भक्ति संपूर्ण । एकमेकांते शोभवून । नांदती अनादि एकपणें ॥३०५॥
शर्करेविरहित गोडी नाहीं । गोडीवाचूंन शर्करा नाहीं । शर्करा गोडी एके ठायीं । अव्यभिचारें नांदती ॥३०६॥
जे शर्करा तीच गोडी । गोडी तेचि शर्करा फुडी । व्यक्त अव्यक्त परवडी । एकरूपणें ॥३०७॥
तैसा ज्ञानरूप परमात्मा । भक्ति तरी त्याचीच प्रतिमा । भेदाभेदाची झाली सीमा । एक आत्मरूप सकळ ॥३०८॥