माधव जूलियन - तूच निर्वाणींचा सखा

[अभङग]

तूच निर्वाणींचा सखा
तरी तुला मी पारखा
कुणा कुणासाठी आणि
करीं जिवाचें मी पाणी !
वेड तुझें नाही कां बा ?
तूच सौन्दर्याचा गाभा
चाले रङगीत बाहुली
आणि जडे प्रीति खुळी.
मित्र तूच चिदानन्द
मन माझें परी अन्ध,
मित्र सुगीचे साङगाती
सुख माझें त्यांच्या हातीं
येतां दुर्दिनाची छाया
लागतों मी तुझ्या पायां
तूच सोडवी हें कोडें -
प्रेम तुझें केवी जोडे ?