माधव जूलियन - श्याम रजनी

[वृत्त वियोगिनी]

सखये, रजनी तुझ्यापरी
दिसते श्यामल आणि सुन्दर;
किति ही सुखशान्त रागिणी !
परि तू - हाय कितीक अन्तर ! १

करिती गगनांत तारका
नयनांचा तव मूक मत्सर;
दुरुनी मज या खुणाविती,
परि कोडेंच तुझ्या मुखावर. २

मिणमीण करी दुरी दिवा,
मज तो फक्त दिशाच दाखवी,
न ऊजेड कुठे पडे पथीं,
भवती किर्र करी घनाटवी. ३

निजलीं तरुकोटरांमधे
अथवा चञ्चल डाहळीवरी,
अपुल्या घरटयांत पाखरें -
मज ऐकासच जाग ही वरी. ४

विसरूनि दिनास लोटल्या
गवती टोळ ऊथेच झोपतो,
ऊतका जरि नीच हा किडा,
मजहूनीहि सुखी निकोप तो. ५

निजली असशील तू प्रिये,
मृदु शय्येवरा आपुल्या गृहीं,
कुठलें तुज शीत त्या स्थलीं ?
कुठली गे मनिं काळजी, दुही ? ६

परि मी फिरतों भिरीभिरी,
मज दे सङगत रात्रिकीटक;
फुलबाग दुरी फुले, फुलो;
सलतो सन्तत येथ कण्टक. ७

ता. २० सप्टेम्बर १९१३