पद - रेल गाडींत बसून चाल

रेल गाडींत बसून चाल । धटि नेसून तांबडी लाल ॥धृ०॥
तुज तन मन धन, केलें समर्पण । नको रागानं फुगवूं गाल ॥१॥
तुझी तनु कवळी, अंगावर पिवळी । शोभे नारळी पदरी शाल ॥२॥
तुझें रुप लावण्य, तुझें गुण अगण्य । तुझें तारुण्य वय चिरकाल ॥३॥
सरि गोफ पुतळ्या, नथ फुल बाळ्या । तुझ्या मोत्याच्या लडिमधें लाल ॥४॥
मुखचंद्र निर्मळ, कुंकुम काजळ । तुझ्या वेणीचे मोकळे बाल॥५॥
तुज करितां नवी, कंचुकि हिरवी । जरिकाठाची बेतली काल ॥६॥
कंकण पैंजण, वाजती खणखण । तुझी मंद गजाकृति चाल ॥७॥
सुगंध भरपुर, चंदन कर्पुर । उडें केशरी रंग गुलाल ॥८॥
अति सकुमारी तूं, राजकुमारी । पायवाटेनं होतिल हाल ॥९॥
नवरंगाचा, नव भिंगाचा । तुझा अभंग रंगमहाल ॥१०॥
विषवत्‍ नावडे, राज्य तुझ्यापुढें । गृहलक्ष्मी कवडी माल ॥११॥
विष्णुदास म्हणे, अम्ही मनरमणे । तुला पाहून सदा खुशाल ॥१२॥