भूपाळी - भूपाळी ४

( चाल : नियम पाळावे )
निजलिस कायी । उठ लवकर अंबाबाई ॥धृ०॥
तूं निजलिस शाल पांघरुन । गेलीस झोंपिं घुरघुरुन ।
आला काळ जवळ गुरगुरुन । अग आइ, आई ॥ उठ० ॥१॥
हा मनाजी द्वाड गायकी । याला दिली घरचि नायकी ।
हा प्राण घेतो काय कीं । अग आइ, आई ॥ उठ० ॥२॥
तूं आहेस झोंपेच्या भरांत । पहा शिरले चोरटे घरांत ।
माझ्या धडकिच भरली उरांत । अग आइ, आई ॥ उठ० ॥३॥
काम - क्रोधादिक हे मांग । पुष्पांचा मोडिति बाग ।
चहूंकडून लाविली आग । अग आइ, आई ॥ उठ० ॥४॥
सांभाळि अपुलें लेंकरुं । नको माते, उपेक्षा करुं ।
म्हणे विष्णुदास कसें करुं । अग आइ, आई ॥ उठ० ॥५॥