मना तूं सोडी, मना तूं सोडी । ह्या विषय विषाची गोडी ॥धृ०॥
प्रथम विषय वाटती गोड । क्षण एक पुरविती तुझें कोड ।
परी तें आहेत मोठें द्वाड । घालीती संसार बेडी, संसार बेडी ।
ह्या विषय विषाची गोडी०॥१॥
वासना गळां पडतां धामीण । सोडी न तुज मी एकही क्षण ।
पाठी लागे जन्ममरण । नरका धाडी, नरका धाडी ।
ह्या विषय विषाची गोडी०॥२॥
मिळुनी विषय हे पांचीजण । घेतील तुझे पंचप्राण ।
तेथे तुजला सोडवी कोण । म्हणुनी हरी जोडी, म्हणुनी हरी जोडी ।
ह्या विषय विषाची गोडी०॥३॥
वणवण फिरुनी देशोधडी । न मिळे एकही फुटकी कवडी ।
दृष्य वस्तुची आशा सोडी । स्वरुपीं दे बुडी, स्वरुपीं दे बुडी ।
ह्या विषय विषाची गोडी०॥४॥
श्रीहरीचरणीं जडतां वृत्ती । नामस्मरण धरी तूं चित्तीं ।
विषय तुज ते नच बाधती । वारी सांगे घडी घडी, सांगे घडी घडी ।
ह्या विषय विषाची गोडी०॥५॥