लावणी १५५ वी - आम्ही आबरूच्या नारी । सजण...

आम्ही आबरूच्या नारी । सजणा, लाजून उभी मी द्वारीं ॥धृ०॥

छेलबटाऊ मी मनमोहना । पाखव्रत मी आहे मनपवना । सुवासिक सुगंध गुलाब दवणा । अपहस्तें मज मारी ॥१॥

बाळपणाची प्रीत रसाची । आली घटका मज वेळ रुताची । भेट झाली आज या हंसाची । जाई सख्या परभारी ॥२॥

का करता हित्येय (?) कंटाळा ? नाजुक कांती तुझी बहु भाळा (?) । दुरुदुरु जाशी, नको करूं थाळा । झाले तुजसाठीं खोरी ॥३॥

आज लई दिवसां मज सापडला । तुजला पहातां विषय चढला । जसा मृगाचा पाऊस पडला । सगनभाऊ अवतारी । रामजी ब्रीदाचा अधिकारी ॥४॥