भरद्वाज उवाच
नवधा सृष्टिरुत्पन्ना ब्रह्मणोऽव्यक्तजन्मनः ।
कथं सा ववृधे सूत एतत्कथय मेऽधुना ॥१॥
सूत उवाच
प्रथमं ब्रह्मणा सृष्टा मरीच्यादय एव च ।
मरीचिरत्रिश्च तथा अङ्गिराः पुलहः क्रतुः ॥२॥
पुलस्त्यश्च महातेजाः प्रचेता भृगुरेव च ।
नारदो दशमश्चैव वसिष्ठश्च महामतिः ॥३॥
सनकादयो निवृत्ताख्ये ते च धर्मे नियोजिताः ।
प्रवृत्ताख्ये मरीच्याद्या मुक्त्वैकं नारदं मुनिम् ॥४॥
योऽसौ प्रजापतिस्त्वन्यो दक्षनामाङ्गसम्भवः ।
तस्य दौहित्रवंशेन जगदेतच्चराचरम् ॥५॥
देवाश्च दानवाश्चैव गन्धर्वोरगपक्षिणः ।
सर्वे दक्षस्य कन्यासु जाताः परमधार्मिकाः ॥६॥
चतुर्विधानि भूतानि ह्यचराणि चराणि च ।
वृद्धिंगतानि तान्येवमनुसर्गोद्भवानि तु ॥७॥
अनुसर्गस्य कर्तारो मरीच्याद्या महर्षयः ।
वसिष्ठान्ता महाभाग ब्रह्मणो मानसोद्भवाः ॥८॥
सर्गे तु भूतानि धियश्च खानि
ख्यातानि सर्वं सृजते महात्मा ।
स एव पश्चाच्चतुरास्यरुपी मुनिस्वरुपी च सृजत्यनन्तः ॥९॥
इति श्रीनिरसिंहपुराणें चतुर्थाऽध्यायः ॥४॥