योगनक्षत्रांचे तीन प्रकार

ज्योतिषग्रंथांत योगनक्षत्रांचे ( १ ) पूर्वभागयोगी, ( २ ) मध्यभागयोगी, व ( ३ ) अपरभागयोगी ” असे तीन प्रकार वर्णिले आहेत. पहिल्या प्रकारात रेवती व अश्विन्यादी पाच नक्षत्रे येतात; दुसर्‍या आर्द्रा नक्षत्रापासूनच्या बारा नक्षत्रांची गणना होते, व तिसर्‍यात ज्येष्ठेपासून बाकीच्या नऊ नक्षत्रांचा समावेश होतो. स्त्रियांना पती प्रिय असणे हे पहिल्या प्रकाराचे फ़ळ होय; दुसर्‍या प्रकारांत स्त्रीपुरुषांची एकमेकांवर प्रीती असते; व तिसर्‍यांत स्त्रीवर अनेक पुरुष आसक्त होतात. या प्रकारांपैकी स्त्रीचे जन्मनक्षत्र एक व त्याच्याच पुढचे नक्षत्र ते वराचे जन्मनक्षत्र असा प्रकार झाला असता तो पतिप्राणहानी करणारा होतो.