स्त्रीगीत - पाळणा मुलाचा

जोजो रे बाळा गाई । गाई
हलविते पाळणा झोकात आई ॥धृ॥
सुकुमार सुंदर तूं बाळराजा
माझिया जिवाचा अससि कालिजा
मुळी आता रडायच नाही । नाही ॥१॥
माझिया भाग्याचे उघडे दालन
तुजसम बहुमोल लाभले रत्न
न्हाते मी मोदात आई । आई ॥२॥
पाळणा रंगित बघ सजविला
वरी मोतियाचा चांदवा केला
हौशीला वाण ती नाही । नाही ॥३॥
कुंचीला शिविले पिंपळपान
मोतियाच्या डुलांनी शोभती कान
घातले वाळे हे पायी । पायी ॥४॥
कशिद्याची चादर रेशमी शेला
साखळी सोन्याची घालुं दे गळा
थोरांची जणु ही पुण्याई ॥५॥
हो भाग्यवंत, गुणवंत बाळा
तुझिया यशाचे कौतुक मला
स्वप्नात दंग ही आई । आई ॥६॥