विष्णुस्मृतिः - अध्यायः ९४

गृही वलीपलितदर्शने वनाश्रयो भवेत् ॥९४.१॥

अपत्यस्य चापत्यदर्शने वा ॥९४.२॥

पुत्रेषु भार्यां निक्षिप्य तयानुग्म्यमानो वा ॥९४.३॥

तत्राप्यग्नीनुपचरेत् ॥९४.४॥

अफालकृष्टेन पञ्च यज्ञान्न हापयेत् ॥९४.५॥

स्वाध्यायं च न जह्यात् ॥९४.६॥

ब्रह्मचर्यं पालयेत् ॥९४.७॥

चर्मचीरवासाः स्यात् ॥९४.८॥

जटाश्मश्रुलोमनखांश्च बिभृयात् ॥९४.९॥

त्रिषवणस्नायी स्यात् ॥९४.१०॥

कपोतवृत्तिर्मासनिचयः संवत्सरनिचयो वा ॥९४.११॥

संवत्सरनिचयी पूर्वनिचितं आश्वयुज्यां जह्यात् ॥९४.१२॥

ग्रामादाहृत्य वाश्नीयादष्टौ ग्रासान्वने वसन् ।
पुटेनैव पलाशेन पाणिना शकलेन वा ॥९४.१३॥