विष्णुस्मृतिः - अध्यायः ७०

नार्द्रपादः सुप्यात् ॥७०.१॥

नोत्तरापरशिराः ॥७०.२॥

न नग्नः ॥७०.३॥

नानुवंशं ॥७०.४॥

नाकाशे ॥७०.५॥

न पालाशे शयने ॥७०.६॥

न पञ्चदारुकृते ॥७०.७॥

न गजभग्नकृते ॥७०.८॥

न विद्युद्दग्धकृते ॥७०.९॥

न भिन्ने ॥७०.१०॥

नाग्निपृष्ठे ॥७०.११॥

न घटासिक्तद्रुमजे ॥७०.१२॥

न श्मशानशून्यालयदेवतायतनेषु ॥७०.१३॥

न चपलमध्ये ॥७०.१४॥

न नारीमध्ये ॥७०.१५॥

न धान्यगोगुरुहुताशनसुराणां उपरि ॥७०.१६॥

नोच्छिष्टो न दिवा सुप्यात्संध्ययोर्न च भस्मनि ।
देशे न च अशुचौ नार्द्रे न च पर्वतमस्तके ॥७०.१७॥