श्रीशिवाष्टकम् - प्रभुमीशमनीशमशेषगुणं गुणह...

प्रभुमीशमनीशमशेषगुणं गुणहीनमहीशगराभरणम् ।
रणनिर्जितदुर्जयदैत्यपुरं प्रणमामि शिवं शिवकल्पतरुम् ॥१॥
गिरिराजसुतान्वितवामतनुं तनुनिन्दितराजितकोटिविधुम् ।
विधिविष्णुशिरोधृतपादयुगं प्रणमामि शिवं शिवकल्पतरुम् ॥२॥
शशलाञ्छितरञ्जितसन्मुकुटं कटिलम्बितसुन्दरकृत्तिपटम् ।
सुरशैवलिनीकृतपूतजटं प्रणमामि शिवं शिवकल्पतरुम् ॥३॥
नयनत्रयभूषितचारुमुखं मुखपद्मपराजितकोटिविधुम्।
विधुखण्डविमण्डितभालतटं प्रणमामि शिवं शिवकल्पतरुम् ॥४॥
वृषराजनिकेतनमादिगुरुं गरलाशनमाजिविषाणधरम् ।
प्रमथाधिपसेवकरञ्जनकं प्रणमामि शिवं शिवकल्पतरुम् ॥५॥
मकरध्वजमत्तमतङ्गहरं करिचर्मगनागविबोधकरम् ।
वरमार्गणशूलविषाणधरं प्रणमामि शिवं शिवकल्पतरुम् ॥६॥
जगदुद्भवपालननाशकरं त्रिदिवेशशिरोमणिघृष्टपदम् ।
प्रियमानवसाधुजनैकगतिं प्रणमामि शिवं शिवकल्पतरुम् ॥७॥
हृदयस्थतमःप्रकरापहरं नृमनोजनिताघविनाशकरम् ।
भजतोऽखिलदुःखसमिद्धहरं प्रणमामि शिवं शिवकल्पतरुम् ॥८॥