गुणि बाळ असा जागसि कां रे वायां ? ॥ नीज रे नीज शिवराया ॥धृ०॥
अपरात्रीचा प्रहर लोटला बाई ॥ तरि डोळा लागत नाहीं ॥
हा चालतसे चाळा एकच असला ॥ तिळ उसंत नाहिं जिवाला ॥
निजवायाचा हरला सर्व उपाय ॥ जागाच तरी शिवराय ॥
चालेल जागता चटका ।
हा असाच घटका घटका ।
कुरवाळा किंवा हटका ।
हा कष्टविशी तुझी सांवळी काया ? ॥ नीज रे नीज शिवराया ॥१॥
ही शांत निजे बारा मावळ थेट ॥ शिवनेरी जुन्नरपेठ ॥
त्या निजल्या ना तशाच घांटाखालीं ॥ कोंकणच्या चवदा ताली ॥
ये भिववाया बागुल तो बघ बाळा ॥ किति बाई काळा काळा ! ॥
इकडे हे सिद्दि -जमान ।
तो तिकडे अफजुलखान ।
पलिकडे मुलुखमैदान ।
हे आले रे तुजला बाळ धराया ॥ नीज रे नीज शिवराया ! ॥२॥