राम गणेश गडकरी - घास घे रे तान्ह्या बाळा ।...

घास घे रे तान्ह्या बाळा । गोविंदा गोपाळा ।
भरवी यशोदामाई । सांवळा नंदबाळ घेई ॥धृ०॥

घेईं कोंडा कणी । त्रैलोक्याचा धणी ।
विदुराघरींचा । पहिलावहिला घास ॥१॥

पोहे मूठभरी । क्षीराब्धीचा हरी ।
मैत्र सुदामजीचा । आला दुसरा घास ॥२॥

थाळी एक्या देठीं । घ्यावी जगजेठी ।
द्रौपदीमाईचा । आला तिसरा घास ॥३॥

उरल्या उष्टावळी । फळांच्या वनमाळी ।
शबरीमिल्लिणीचा । घ्या हो चवथा घास ॥४॥

टाकूं ओवाळून ! मुखचंद्रावरून ।
“गोविंदाग्रजा” चा । उरलासुरला घास ॥५॥