श्रीकृष्ण माधुरी - पद ११६ से १२०

११६.
राग धनाश्री
हरि मुख निरखति नागरि नारि।
कमल नैन के कमल बदन पै बारिज डारिय वारि ॥१॥
सुमति सुंदरी सरस पिया रस लंपट माँडी आरि।
हरि जोहारि जु करत बसीठी, प्रथमै प्रथम चिन्हारि ॥२॥
राखति ओट कोटि जतनन करि झाँपति अंचल झारि।
खंजन मनौ उडन कौं आतुर सकत न पंख पसारि ॥३॥
देखि सरुप स्याम सुंदर कौ, रही न पलक सम्हारि।
देखौ सूरज अधिक सूर तन अजौं न मानी हारि ॥४॥


११७.
हरि मुख किधौं मोहनी माई।
बोलत बचन मंत्र सौ लागत, गति मति जाति भुलाई ॥१॥
कुटिल अलक राजति भ्रुव ऊपर जहाँ तहाँ बगराई।
स्याम फाँसि मन करष्यौ हमरौ, अब समुझी चतुराई ॥२॥
कुंडल ललित कपोलन झलकत, इन की गति मैं पाई।
सूर स्याम जुबती मन मोहन ऐ सँग करत सहाई ॥३॥


११८.
राग नट
निरखत रुप नागरि नारि।
मुकुट पै मन अटकि लटक्यौ, जात नहिं निरवारि ॥१॥
स्याम तन की झलक आभा चंद्रिका झलकाइ।
बार बार बिलोकि थकि रहिं, नैन नहिं ठहराइ ॥२॥
स्याम मरकत मनि महानग सिखा निरतत मोर।
देखि जलधर हरष उर मैं, नाहिं आनँद थोर ॥३॥
कोउ कहति सुर चाप मानौ गगन भयौ प्रकास।
थकित ब्रज ललना जहाँ तहँ, हरष कबहुँ उदास ॥४॥
निरखि जो जिहि अंग राँची, तही रही भुलाइ।
सूर प्रभु गुन रासि सोभा रसिक जन सुखदाइ ॥५॥


११९.
राग बिहागरौ
देखि री, देखि सोभा रासि।
काम पटतर कह दीजै, रमा जिन की दासि ॥१॥
मुकुट सीस सिखंड सोहै, निरखि रहिं ब्रज नारि।
कोटि सुर कोदंड आभा झिरकि डारैं वारि ॥२॥
केस कुंचित बिथुरि भ्रुव पै बीच सोभा भाल।
मनौ चंदै अबल जान्यौ, राहु घेर्‍यौ जाल ॥३॥
चारु कुंडल सुभग स्त्रवनन को सकै उपमाइ ॥४॥
सुभग मुख पै चारु लोचन, नासिका इहि भाँति।
मनौ खंजन बीच सुक मिलि बैठे है इक पाँति ॥५॥
सुभग नासा तर अधर छबि रस धरैं अरुनाइ।
मनौ बिंब निहारि सुक भ्रुव धनुष देखि डराइ ॥६॥
हँसत दसनन चमकताई, ब्रज कन रचि पाँति।
दामिनी, दारिम नही सरि कियौ, मन अति भ्राँति ॥७॥
चिबुक बर चित बित चुरावत, नवल नंद किसोर।
सूर प्रभु की निरखि सोभा भईं तरुनी भोर ॥८॥


१२०.
राग सोरठ
तन मन नारि डारति वारि।
स्याम सोभा सिंधु जान्यौ अंग अंग निहारी ॥१॥
पचि रहीं मन ग्यान करि करि लहतिं नाहिन तीर।
स्याम तन जल रासि पूरन, महा गुन गंभीर ॥२॥
पीतपट फहरानि, मानौ लहरि उठति अपार।
निरखि छबि थकि तीर बैठी, कहूँ वार न पार ॥३॥
चलत अंग त्रिभंग करि कैं, भौंहे भाव कैं, भौंहे भाव चलाइ।
मनौ बिच बिच भँवर डोलत, चित परत भरमाइ ॥४॥
स्त्रवन कुंडल मकर मानौ, नैन मीन बिसाल।
सलिल झलकानि रुप आभा, देखि री नँदला ॥५॥
बाहु दंड भुजंग मानौ जलधि मध्य बिहार।
मुक्त माला मनौ सुरसरि ह्वै चली द्वै धार ॥६॥
अंग अँग भूषन बिराजत, कनक मुकुट प्रभास।
उदधि मथि मनु प्रगट कीन्हौ श्री सुधा परगास ॥७॥
चकित भइँ तिय निरखि सोभा देह गति बिसराइ।
सूर प्रभु छबि रासि नागर, जानि जाननिराइ ॥८॥