श्रीकृष्ण माधुरी - पद ७१ से ७५

७१.
राग गुन-सारंग
मेरे नैन निरखि सचु पावै।
बलि बलि जाउँ मुखारबिंद की, बन तैं बनि ब्रज आवैं ॥१॥
गुंजा फल अवतंस, मुकुट मनि, बेनु रसाल बजावैं।
कोटि किरन मनि मंजु प्रकासित, उडपति बदन लजावै ॥२॥
नटवर रुप अनूप छबीले, सबहिनि के मन भावैं।
सूरदास प्रभु चलत मंद गति, बिरहिनि ताप नसावैं ॥३॥

७२.
राग गौरी
बलि बलि मोहनि मूरति की, बलि
बलि कुंडल, बलि नैन बिसाल ।
बलि भ्रकुटी, बलि तिलक बिराजत,
बलि मुरली, बलि सब्द रसाल ॥१॥
बलि कुंतल, बलि पाग लटपटी,
बलि कपोल, बलि उर बनमाल।
बलि मसुकानि महामुनि मोहति,
बलि उपरैना गिरिधर लाल ॥२॥
बलि भुज सखा अंस पर मेले,
निरखत मगन भईं ब्रज बाल।
बलि दरसन ब्रह्मादिक दुरलभ,
सूरदास बलि चरन गुपाल ॥३॥

७३.
राग जैतश्री
ए रे सुंदर साँवरे, तैं चित लियौ चुराइ।
संग सखा संझा समै द्वारैं निकस्यौ आइ ॥१॥
देखि रुप अद्भुत तेरौ, रहे नैन उरझाइ।
पाग ऊपर गोसमावल, रँग रँग रची बनाइ ॥२॥
अति सुंदर सुक नासिका, राजत लोल कपोल।
रत्न जटित कुंडल मनौ झष सर करत कलोल ॥३॥
कटि तट काछनि राजई, पीतांबर छबि देत।
अमृत बचन मुख भाषई, तन मन बस करि लेत ॥४॥
भौंह धनुष बर नैन द्वै मनौ मदन सर साँधि।
जाहि लगै सो जानई, संग लेत बल बाँधि ॥५॥
अंग अंग पै बलि गई, मुरली नैकु बजाइ
सुनि पावैं सचु गोपिका, सूरदास बलि जाइ ॥६॥

७४.
राग बिलावल
स्याम कछु मो तन ही मुसुकात।
पहरि पितंबर, चरन पाँवरी, ब्रज बीथिनि मैं जात ॥१॥
अद्भुत बिंद चँदन, नख-सिख लौं सोंधे भीने गात।
अलकावली अधर, मुख बीरा, लिए कर कमल फिरात ॥२॥
धन्य भाग या ब्रज के सखि री, धनि जननी तात।
धनि जे सूरदास प्रभु निरखित लोचन नाहिं अघात ॥३॥

७५.
राग अडानौ
स्याम सुँदर आवत बन तैं बने भावत,
आजु देखि देखि छबि नैन रीझे।
सीस पै मुकुट डोल, श्रवन कुंडल लोल,
भ्रकुटि धनुष, नैन खंज खीझे ॥१॥
दसन दामिनि ज्योति, उर पर माल मोति,
ग्वाल बाल संग आवै रंग भीजे।
सूर प्रभु राम श्याम, संतनि के सुखधाम,
अंग अंग प्रति छबि देखि जीजै ॥२॥