श्रीकृष्ण माधुरी - पद २६ से ३०

२६.
सखि री, नंद नंदन देखु।
धूरि धूसर जटा जुटली, हरि किएँ हर भेषु ॥१॥
नील पाट पिरोइ मनि गन फनिंग धोखैं जाइ।
खुनखुना कर हँसत हरि, हर नचत डौंरु बजाइ ॥२॥
जलज माल गुपाल पहिरैं, कहा कहौं बनाइ।
मुंड माला मनौ हर गर ऐसी सोभा पाइ ॥३॥
स्वाति सुत माला बिराजत स्याम तन इहिं भाइ।
मनौ गंगा गौरि डर हर लई कंठ लगाइ ॥४॥
केहरी नख निरखि हिरदैं रहि नारि बिचारि।
बाल ससि मनु भाल तैं लै उर धर्‍यौ त्रिपुरारी ॥५॥
देखि अंग अनंग झिझक्यौ, नंद सुत हर जान।
’ सूर ’ के हिरदै बसौ नित स्याम सिव कौ ध्यान ॥१६॥


२७.
देखो माई ! दधि सुत मैं  दधि जात।
एक अचंभौ देखि सखी री, रिपु मैं रिपु जु समात ॥१॥
दधि पै कीर, कीर पै पंकज, पंकज के द्वै पात ।
यह सोभा देखत पशु पालक फूले अंग न मात ॥२॥
बारंबार बिलोकि सोचि चित नंद महर मुसुक्यात।
यहै ध्यान मन आनि स्याम कौ सूरदास बलि जात ॥३॥


२८.
बिहरत बिबिध बालक संग।
डगनि डगमग पगनि डोलत धूरि धूसर अंग ॥१॥
चलत मग, पग बजति पैंजनि, परसपर किलकात।
मनौ मधुर मराल छौना बोलि बैन सिहात ॥२॥
तनक कटि पै कनक करधनि छीन छबि चमकाति।
मनौ बासव बलि पठाए जीव कबि कछु कहत ॥४॥
ललित लट छिटकाति मुख पै, देति सोभा दून।
मनु मयंकै अंक लीन्हौ सिंहिका कैं सून ॥५॥
कबहुँ द्वारैं दौरि आवत, कबहुँ नंद निकेत।
’ सूर ’ प्रभु कर गहति ग्वालिनि चारु चुंबन हेत ॥६॥


२९.
राग सूहौ बिलावल
देखि माई, हरि जू की लोटनि। यह छबि निरखि रही नँदरानी,
अँसुवा ढरि ढरि परत करोटनि ॥१॥
परसत आनन मनु रबि-कुंडल,
अंबुज स्त्रवत सीप सुत जोटनि।
चंचल अधर, चरन कर चंचल,
मंचल अंचल गहत बकोटनि॥२॥
लेति छुडाइ महरि कर सौं कर,
दूरि भई देखति दुरि ओटनि।
सूर निरखि मुसुकाइ जसोधा
मधुर मधुर बोलति मुख होटनि॥३॥


३०.
राग बिलावल
भोर भएँ निरखत हरि कौ मुख
प्रमुदित जसुमति, हरषित नंद।
दिनकर किरन कमल ज्यौं बिकसत
निरखत उर उपजत आनंद ॥१॥
बदन उधारि जगावति जननी,
जागौ, बलि गइ, आनँद कंद ।
मनौ मथत सुर सिंधु, फेन फटि
दयौ दिखाई पूरन चंद ॥२॥
जाकौं ईस सेष ब्रह्मादिक
गावत नेति नेति स्त्रुति छंद।
सो गुपाल ब्रज मैं सुनि सुरज
प्रघटे पूरन परमानंद ॥३॥