श्रीकृष्ण माधुरी - पद ८१ से ८५

८१.
राग नट
माधौ जू के बदन की सोभा।
कुटिल कुंतल कमल प्रति मनु मधुप रस लोभा ॥१॥
भ्रकुटि इमि नव कंज पर जनु सरत चंचल मीन।
मकर कुंडल छबि किरन रबि परसि बिगसित कीन ॥२॥
सुरभि रेनु पराग रंजित, मुरलि धुनि अलि गुंज।
निरखि सुभग सरोज मुदित मराल सम सिसु पुंज ॥३॥
दसन दामिनि बीच मिलि मनु जलद मध्य प्रकास।
निगम बानी नेती क्यौं कहि सकै सूरदास ॥४॥


८२.
देखि री देखि मोहन ओर।
स्याम सुभग सरोज आनन चारु चित के चोर ॥१॥
नील तनु मनु जलद की छबि, मुरलि सुर घन घोर।
दसन दामिनि लसति बसननि, चितवनी झकझोर ॥२॥
स्त्रवन कुंडल, गंड मंडल उदित ज्यौं रबि भोर।
बरहि मुकुट बिसाल माला, इंद्र धनु छबि थोर ॥३॥
धातु चित्रित भेष नटवर, मुदित नवल किसोर।
सूर स्याम सुभाइ आतुर, चितै लोचन कोर ॥४॥


८३.
राग कल्यान
माधौ जू के तन की सोभा कहत नही बनि आवै।
अँचवत सादर दुहुँ लोचन पुट, मन नाही तृपितावै ॥१॥
सघन मेघ अति स्याम सुभग बपु, तडित बसन, बनमाल।
सिर सिखंड, बन धातु बिराजत सुमन सुरंग प्रबाल ॥२॥
कछुक कुटिल कमनीय सघन अति गोरज मंडित केस।
अंबुज रुचि पराग पर मानौ राजत मधुप सुदेस ॥३॥
कुंडल लोल कपोल किरन गन, नैन कमल दल मीन।
अधर मधुर मुसुकानि मनोहर, करत मदन मन हीन ॥४॥
प्रति प्रति अंग अनंग कोटि छबि, सुनि सखि परम प्रबीन।
सूर दृष्टि जहँ जहाँ परति, तहँ तही रहति ह्वै लीन ॥५॥


८४.
राग हमीर
चितवनि मैं, कि चंद्रिका मैं, किधौं मुरली माझि ठगौ री।
देखत, सुनत मोहैं, जिहि सुर, नर, मुनि, मृग और खगौ री ॥१॥
जब तैं दृष्टि परे मन मोहन, गृह मेरो मन न लगौ री।
सूर स्याम बिनु छिनु न रहौं मैं, मन उन हाथ पगौ री ॥२॥

८५.
राग कल्यान
लाल की रुप माधुरी, निरखि नैकु सखी री।
मनसिज मन हरनि हाँसि, साँवरौ सुकुमार रासि,
नख सिख अंग-अंग निरखि सोभा सींव नखी री ॥१॥
रँगमँगि सिर सुरँग पाग, लटकि रही बाम भाग,
चंपकली कुटिल अलक बीच-बीच रखी री।
आयत दृग अरुन लोल, कुंडल मंडित कपोल,
अधर दसन दीपति छबि क्यौंहुँ न जाति लखी री ॥२॥
अभयद भुजदंड मूल पीन अंस सानुकूल,
कनक मेखला दुकूल दामिनी धरषी री।
उर पै मंदार हार, मुक्ता लर बर सुढार,
मत्त द्विरद गति तियनि की देह-दसा करषी री ॥३॥
मुकुलित बय नव किसोर, वचन रचन चितै चोर,
माधुरी प्रकास मंजरी अनूप चखी री।
सूर स्याम अति सुजान, गावत कल्यान तान,
सप्त सुरनि कल तिहि पर मुरलिका बरषी री ॥४॥