श्रीकृष्ण माधुरी - पद ३६ से ४०

३६.
राग कल्यान
सुंदर स्याम, सुँदर बर लीला,
सुंदर बोलत बचन रसाल।
सुंदर चारु कपोल बिराजत,
सुंदर उर जु बनी बनमाल ॥१॥
सुंदर चरन, सुँदर है नख मनि,
सुंदर कुंडल हेम जराल।
सुंदर मोहन नैन चपल किए,
सुंदर ग्रीवा बाहु बिसाल ॥२॥
सुंदर मुरली मधुर बजावत, सुंदर है मोहन गोपाल।
सूरदास जोरी अति राजति,
ब्रज कौं आवत सुंदर चाल ॥३॥


३७.
सुंदर स्याम, सखा सब सुंदर, सुन्दर बेष धरैं, गोपाल।
सुंदर पथ, सुंदर गति आवन, सुंदर मुरली शब्द रसाल ॥१॥
सुंदर लोग, सकल ब्रज सुंदर, सुंदर हलधर, सुंदर चाल।
सुंदर बचन, बिलोकनि सुंदर, सुंदर गुन, सुंदर बनमाल ॥२॥
सुंदर गोप, गाइ अति सुंदर, सुंदरि गन सब करति बिचार।
सूर स्याम सँग सब सुख सुंदर, सुंदर भक्त हेत अवतार ॥३॥


३८.
राग बिलावल
सुंदर ढोटा कौन कौ, सुंदर मृदु बानी।
कहि समुझायौ ग्वालिनी, जायौ नँदरानी ॥१॥
सुंदर मूरति देखि कैं घन घटा लजानी।
सुंदर नैनन हरि लियौ कमलन कौ पानी ॥२॥                
सुंदरता तिहु लोक की जसुमति ब्रज आनी।
सूरदास पुर मैं भई सुंदर रजधानी ॥३॥


३९.
राग गौरी
देखि सखी ! बन तैं जु बने ब्रज आवत हैं नँदनंदन।
सिखी सिखंड सीस, मुख मुरली, बन्यौ तिलक, उर चंदन ॥१॥
कुटिल अलक मुख, चंचल लोचन, निरखत अति आनंदन।
कमल मध्य मनु द्वै खग खंजन बँधे आइ उडि फंदन ॥२॥
अरुन अधर छबि दसन बिराजत, जब गावत कल मंदन।
मुक्ता मनौ नीलमनियमपुट, धरे भुरकि बर बंदन ॥३॥
गोप बेष गोकुल गो चारत हैं हरि असुर निकंदन।
सूरदास प्रभु सुजस बखानत नेति नेति स्त्रुति छंदन ॥४॥

४०.
राग सारंग
सीतल छैयाँ स्याम हैं ठाढे,
जानि भोजन की बिरियाँ।
बाम भुजाहि सखा अँस दीन्हे,
दच्छिन कर द्रुम डरियाँ ॥१॥
गाइनि घेरि, टेरि बलरामै,
ल्यावौ करत अबिरियाँ।
सूरदास प्रभु बैठि कदम तर,
खात दूध की खिरियाँ ॥२॥