श्रीकृष्ण माधुरी - पद ९६ से १००

९६.
देखि सखि ! हरि को मुख चारु।
मनो छिडाइ लियौ नँद नंदन वा ससि कौ सत सारु ॥१॥
रुप तिलक, कच कुटिल, किरन छबि कुंडल कल बिस्तारु।
पत्रावलि परिवेष, सुमन सरि मिल्यौ मनौ उड दारु ॥२॥
नैन चकोर बिहंग सूर सुनि, पिवत न पावत पारु।
अब अंबर ऐसौ लागत है, जैसी जूठौ थारु ॥३॥

९७.
राग कान्हरौ
देखि री ! हरि के चंचल तारे।
कमल मीन कौ कहँ एती छबि,
खंजनहू न जात अनुहारे ॥१॥
वह लखि निमिष नवत मुरली पर,
कर मुख नैन भए इकचारे।
मनु जलरुह तजि बैर मिलत बिधु,
करत नाद बाहन चुचुकारे ॥२॥
उपमा एक अनुपम उपजति,
कुंचित अलक मनोहर भारे।
बिडरत बिझुकि जानि रथ तैं मृग,
जनु ससंकि ससि लंगर सारे ॥३॥
हरि प्रति अंग बिलोकि मानि रुचि,
व्रज बनितानि प्रान धन वारे।
सूर स्याम मुख निरखि मगन भइँ,
यह बिचारि चित अनत न टारे ॥४॥


९८.
राग सोरठ
हरि मुख निरखत नैन भुलाने।
ए मधुकर रुचि पंकज लोभी, ताहि तैं न उडाने ॥१॥
कुंडल मकर कपोलनि के ढिंग जनु रबि रैनि बिहाने।
भ्रुव सुंदर, नैननि गति निरखत, खंजन मीन लजाने ॥२॥
अरुन अधर, दुज कोटि बज्र दुति, ससि घन रुप समाने।
कुंचित अलक, सिलीमुख, मिलि मनु लै मकरंद उडाने ॥३॥
तिलक ललाट, कंठ मुकुतावलि भूषन मनियन साने।
सूर स्याम रस निधि नागर के, क्यों गुन जात बखाने ॥४॥

९९.
राग केदारौ
देखि री, नवल नंदकिसोर ।
लकुट सौं लपटाई ठाढे, जुबती जन मन चोर ॥१॥
चारु लोचन, हँसि बिलोकनि, देखि कैं चित भोर।
मोहिनी मोहन लगावत, लटकि मुकुट झकोर ॥२॥
स्त्रवन धुनि सुनि नाद पोहत करत हिरदै फोर।
सूर अंग त्रिभंग सुंदर छबि निरखि तृन तोर ॥३॥

१००.
राग कान्हरौ
ब्रज बनिता देखति नँद नन्दन।
नव घन नील बरन, ता ऊपर खौर कियौ तन चंदन ॥१॥
करन बरन तन पीत पिछौरी, उर भ्राजति बनमाल।
निरमल गगन सेत बादर पै, मनौ दामिनी जाल ॥२॥
मुक्ता माल बिपुल बग पंगति, उडत एक भई जाति।
सूर स्याम छबि निरखत जुबती हरष परस्पर होति ॥३॥