श्रीकृष्ण माधुरी - पद ७६ से ८०

७६.
राग कान्हरौ
राजत री बनमाल गरैं हरि आवत बन तैं।
फूलनि सौं लाल पाग, लटकि रही बाम भाग,
सो छबि लखि सानुराग, टरति न मन तैं ॥१॥
मोर मुकुट सिर सिखंड, गोरज मुख मंजु मंड,
नटवर बर वेष धरैं आवत छबि तैं ।
सूरदास प्रभु की छबि ब्रज ललना निरखि थकित
तन मन न्यौछावर करैं, आनँद बहु तै ॥२॥

७७.
राग गौरी
ब्रज कौं, देखि, सखी ! हरि आवत।
कटि तट सुभग पीतपट राजत, अद्भुत भेष बनावत ॥१॥
कुंडल तिलक चिकुर रज मंडित, मुरली मधुर बजावत।
हँसि मुसुकानि, बंक अवलोकनि, मनमथ कोटि लजावत ॥२॥
पीरी, धौरी, धूमरि, गोरी लै लै नाउँ बुलावत।
कबहूँ गान करत अपनी रुचि करतल तार बजावत ॥३॥
कुसुमित दाम मधुप कुल गुंजत, संग सखा मिलि गावत।
कबहुँक नृत्य करत कौतूहल, सप्तक भेद दिखावत ॥४॥
मंद-मंद गति चलत मनोहर, जुबतिनि रस उपजावत।
आनँद कंद जसोधा नंदन सूरदास मन भावत ॥५॥

७८.
कमल मुख सोभित सुंदर बैनु।
मोहन राग बजावत गावत, आवत चारैं धैनु ॥१॥
कुंचित केस सुदेस बदन पै, जनु साज्यौ अलि सेनु।
सहि न सकत मुरली मधु पीवत, चाहत अपनौं ऐनु ॥२॥
भ्रकुटि मनौ कर चाप आप लै भयौ सहायक मैनु।
सूरदास प्रभु अधर सुधा लगि उपज्यौ कठिन कुचैनु ॥३॥

७९.
राग केदारौ
नैननि निरखि हरि कौ रुप।
चित्त दै मुख चितै, माई ! कमल ऐन अनूप ॥१॥
कुटिल केस सुदेस अलिगन, नैन सरद सरोज।
मकर कुंडल किरन की छबि दुरत फिरत मनोज ॥२॥
अरुन अधर, कपोल, नासा, सुभग ईषद हास।
दसन दामिनि, लजत नव ससि, भ्रकुटि मदन बिलास ॥३॥
अंग अंग अनंग जीते, रुचिर उर बनमाल।
सूर सोभा हृदै पूरन देत सुख गोपाल ॥४॥

८०.
हरि कौ बदन रुप निधान ॥
दसन दाडिम-बीज राजत, कमल कोष समान।
नैन पंकज रुचिर द्वै दल, चलन भौंहनि बान ॥१॥
मध्य स्याम सुभाग मानौ अली बैठ्यौ आन।
मुकुट कुंडल किरन करननि, किएँ किरन को हान ॥२॥
नासिका, मृग तिलक ताकत चिबुक चित्त भुलान।
सूर के प्रभु निगम बानी, कौन भाँति बखान ॥३॥