श्रीकृष्ण माधुरी - पद १११ से ११५

१११.
राग रामकली
मनोहर है नैननि की भाँति।
मानौ दूरि करत बल अपने सरद कमल की काँति ॥१॥
इंदीबर राजीव कुसेसय जीते सब गुन जाति।
अति आनंद सुप्रौढा तातै बिकसत दिन औ राति ॥२॥
खंजरीट, मृग, मीन बिचारे उपमा कौं अकुलाति।
चंचल चारु चपल अवलोकन चितै न एक समाति ॥३॥
जब कहुँ परत निमेषै अंतर, जुग समान पल जाति।
सूरदास वह रसिक राधिका निमि पै अति अनखाति ॥४॥

११२.
आजु सखि ! देख स्याम नए ( री ) ।
निकसे आनि अचानक अबही, इत फिरि फिरि चितए (री ) ॥१॥
मैं तब तैं पछिताति यहै, तन नैन न बहुत भए ( री ) ।
जौं बिधना इतनी जानत है, कित दृग दोइ दए ( री ) ॥२॥
सब दै लेउँ लाख लोचन, कहुँ जो कोउ करत नए ( री )।
हरि प्रति अंग बिलोकन कौं मैं प्रन करि कैं पठए ( री ) ॥३॥
अपने चौंप बहुत कहँ पइए, ए हरि संग गए ( री ) ।
थके चरन सुनि सूर मनौ गुन मदन बान बिधाए ( री ) ॥४॥

११३.
राग गूजरी
देखि री, हरि के चंचल नैन।
खंजन मीन मृगज चपलाई नहिं पटतर इक सैन ॥१॥
राजिव दल, इंदीबर सतदल कमल, कुसेसय जाति।
निसि मुद्रित, प्रातहि वे बिकसत, ए बिकसित दिन राति ॥२॥
अरुन, सेत, स्मित झलक पलक प्रति को बरनै उपमाइ।
मनु सरसुति, गंगा, जमुना मिलि आस्त्रम कीन्हौ आइ ॥३॥
अवलोकनि जलधार तेज अति, तहाँ न मन ठैराइ।
सूर स्याम लोचन अपार छबि उपमा सुनि सरमाइ ॥४॥

११४.
राग सोरठ
देखि सखी ! मोहन मन चोरत।
नैन कटाच्छ बिलोकनि मधुरी, सुभग भृकुटि बिबि मोरत ॥१॥
चंदन खौर ललाट स्याम कें, निरखत अति सुखदाई।
मनौ एक सँग गंग जमुन नभ, तिरछी धार बहाई ॥२॥
मलजय भाल, भ्रकुटि रेखा की कबि उपमा इक पाई।
मानौ अर्धचंद्र तट अहिनी सुधा चुरावन आई ॥३॥
भ्रकुटी चारु निरखि ब्रज सुंदरि यह मन करति बिचार।
सूरदास प्रभु सोभा सागर, कोउ न पावत पार ॥४॥

११५.
राग रामकली
देखि री, देखि कुंडल लोल।
चारु श्रवनन ग्रहन कीन्हे, झलक ललित कपोल ॥१॥
बदन मंडल सुधा सरबर, निरखि मन भयौ भोर।
मकर क्रीडत गुप्त परगट, रुप जल झकझोर ॥२॥
नैन मीन, भुवंगिनी भ्रुव, नासिका थल बीच।
सरस मृगमद तिलक सोभा लसति है लगि कीच ॥३॥
मुख बिकास सरोज मानौ जुबति लोचन भृंग।
बिथुरि अलकैं, परी मानौ प्रेम लहरि तरंग ॥४॥
स्याम तनु छबि अमृत पूरन, रच्यौ काम तडाग ।
सूर प्रभु की निरखि सोभा ब्रज तरुनि बडभाग ॥५॥