श्रीकृष्ण माधुरी - पद ६६ से ७०

६६.
राग सूहौ
मैं बलि जाउँ श्याम मुख छबि पै।
बलि बलि जाउँ कुटिल कच बिथुरे,
बलि भृकुटी लिलाट पै ॥१॥
बलि बलि जाउँ चारु अवलोकनि,
बलि बलि कुंडल रबि की।
बलि बलि जाउँ नासिका सुललित,
बलिहारी वा छबि की ॥२॥
बलि बलि जाउँ अरुन अधरनि की,
बुद्रुम बिंब लजावन।
मैं बलि जाउँ दसन चकमन की,
वारौं तडितनि सावन ॥३॥
मैं बलि जाउँ ललित ठोडी पै,
बलि मोतिन की माल।
सूर निरखि तन मन बलिहारौं,
बलि बलि जसुमति लाल ॥४॥


६७.
राग कान्हरौ
अलकनि की छबि अलि-कुल गावत।
खंजन, मीन, मृगज लज्जित भए, नैननि गति नहिं पावत ॥१॥
मुख मुसुक्यानि आनि उर अंतर अंबुज बुधि उपजावत।
सकुचत अरु बिगसत वा छबि पै, अनुदिन जनम गँवावत ॥२॥
पूजत नाहिं सुभग स्यामल तन, जद्यपि जलधर धावत।
बसन समान होत नहिं हाटक, अगिनि झाँप दै आवत ॥३॥
मुक्ता दाम बिलोकि बिलखि करि, अवलि बलाक बनावत।
सूरदास प्रभु ललित त्रिभंगी, मनमथ-मनहि लजावत ॥४॥

६८.
राग गौरी
आवत बन तैं साँझि देख्यौ मैं गाइनि माँझि
काहू कौ ढोटा री जाकैं सीस मोरपखियाँ।
अतिसी कुसुम तन, दीरघ चंचल नैन,
मानौ रिस भरि कैं लरति जुग झषियाँ ॥१॥
केसर की खौरि किएँ, गुंजा बनमाल हिएँ,
उपमा न कहि आवै जेती नखियाँ।
राजति पीत पिछौरी, मुरली बजावै गौरी,
धुनि सुनि भई बौरी, रही तकि अँखियाँ ॥२॥
चल्यौ न परत पग, गिरि परी सूधैं मग,
भामिनी भवन ल्याई कर गहैं कँखनियाँ।
सूरदास प्रभु चित चोरी लियौ मेरे जान,
और न उपाउ दाउ, सुनौ मेरी सखियाँ ॥३॥


६९.
श्रीकृष्णका व्रजागमन
नटवर भेष धरैं ब्रज आवत।
मोर मुकुट, मकराकृत कुंडल,
कुटिल अलक मुख पै छबि पावत ॥१॥
भ्रकुटी बिकट, नैन अति चंचल,
इहि छबि पै उपमा इक धावत।
धनुष देखि खंजन बिबि डरपत,
उडि न सकत, उडिबे अकुलावत ॥२॥
अधर अनूप मुरलि सुर पूरत,
गौरी राग अलापि बजावत।
सुरभी बृंद गोप बालक सँग,
गावत अति आनंद बढावत ॥३॥
कनक मेखला कटि पीतांबर,
निरतत मंद मंद सुर गावत।
सूर स्याम प्रति अंग माधुरी,
निरखत ब्रज जन जे मन भावत ॥४॥

७०.
राग कल्यान
ब्रज जुबती सब कहति परस्पर,
बन तैं स्याम बने ब्रज आवत।
ऐसी छबि मैं कबहुँ न पाई,
सखी सखी सौं प्रघट दिखावत ॥१॥
मोर मुकुट सिर, जलज माल उर,
कटि, तट पीतांबर छबि पावत ।
नव जलधर पर इंद्र चाप मनु,
दामिनि छबि, बलाक घन धावत ॥२॥
जिहि जो अंग अवलोकन कीन्हौ,
सो तन मन तहँही बिरमावत।
सूरदास प्रभु मुरलि अधर धरैं, आवत राग कल्यान बजावत ॥३॥