श्रीकृष्ण माधुरी - पद ३१ से ३५

३१.
नंद कौ लाल उठत जब सोइ।
निरखि मुखारबिंद की सोभा
कहि, काकैं मन धीरज होइ? ॥१॥
मुनि मन हरत जुबती जन केतिक,
रतिपति मान जात सब खोइ।
ईषद हास दंत दुति बिगसति,
मानिक-मोती धरे जनु पोइ ॥२॥
नागर नवल कुँवर बर सुंदर,
मारग जात लेत मन गोइ।
सूरदास प्रभु मोहनि मूरति
ब्रजवासी मोहे सब लोइ ॥३॥


३२.
राग नट
हरि के बाल चरित अनूप।
निरखि रहिं ब्रजनारि इकटक, अंग अँग प्रति रुप ॥१॥
बिथरी अलकैं रही मुख पै बिनहिं बपन सुभाइ।
देखि कंजनि चंद के बस मधुप करत सहाइ ॥२॥
सजल लोचन, चारु नासा परम रुचिर बनाइ।
जुगल खंजन करत अबिनति, बिच कियौ बनराइ ॥३॥
अरुन अधरनि दसन झाई कहौं उपमा थोरि।
नील पुट बिच मनौ मोती धरे बंदन बोरे ॥४॥
सुभग बाल मुकुंद की छबि बरनि कापै जाइ।
भृकुटि पै मसि बिंदु सोहै सकै सूर न गाइ ॥५॥


३३.
खेलत स्याम अपने रंग।
नंदलाल निहारि सोभा निरखि थकित अनंग ॥१॥
चरन की छबि देखि डरप्यौ  अरुन गगन छिपाइ।
जानु करभा की सबै छबि, निदरि, लई छुडाइ ॥२॥
जुगल जंघन खंभ रंभा नाहिं समसरि ताहि।
कटि निरखि केहरि लजाने, रहे बन घन चाहि ॥३॥
हृदै हरि नख अति विराजत, छबि न बरनी जाइ।
मनौ बालक बारिधर नव चंद दियौ दिखाइ॥४॥
मुक्त माल बिसाल उर पर, कछु कहौं उपमाइ।
मनौ तारा गगनि बेष्टित गगन निसि रह्यौ छाइ ॥५॥
अधर अरुन, अनूप नासा निरखि जन सुखदाइ।
मनौ सुक, फल बिंब कारन, लैन बैठ्यौ आइ ॥६॥


३४.
गो-चारण-माधुरी
राग सोरठ
गोबिंद चलत देखियत नीके।
मध्य गुपाल मंडली राजत काँधैं धरि लये सींके ॥१॥
बछरा बृंद घेरि आगैं करि जन-जन सृंग बजाए।
जनु बन कमल सरोबर तजि कैं मधुप उनीदे आए ॥२॥
बृदांबन प्रबेसि अघ मार्‍यो, बालक जसुमति ! तेरे।
सूरदास प्रभु सुनत जसोधा चित्तै बदन प्रभु केरे ॥३॥

३५.
कन्हैया, हेरी दै।
सुभग साँवरे गात की मैं सोभा कहत लहाउँ।
मोर पंख सिर मुकुट की, मुख मटकनि की बलि जाउँ ॥१॥
कुंडल लोल कपोलन झाईं बिहँसनि चितै चुरावै।
दसन दमक, मोतिन लर ग्रीवा, सोभा कहत न आवै ॥२॥
उर पर पदक कुसुम बनमाला, अंगद खरे बिराजै।
चित्रित बाँह पहुँचिया पहुँचे, हाथ मुरलिया छाजै ॥३॥
कटि पट पीत मेखला मुखरति, पाँइन नूपुर सोहै।
आस पास बर ग्वाल मंडली, देखत त्रिभुवन मोहै ॥४॥
सब मिलि आनँद प्रेम बढावत, गावत गुन गोपाल।
यह सुख देखत स्याम संग कौ सूरदास सब ग्वाल ॥५॥