श्रीकृष्ण माधुरी - पद ५१ से ५५

५१.
राग बिलावल
देखि, सखी, हरि अंग अनूप।
जानु जुगल जुग जंघ बिराजत, को बरनै यह रुप ॥१॥
लकुट लपेटि लटकि भए ठाढे, एक चरन धर धारे।
मनौ नील मनि खंभ काम रचि एक लपेटि सुधारे ॥२॥
कबहुँ लकुट तें जानु फेरि लै अपने सहज चलावत।
सूरदास मानहुँ करभा कर बारंबार डुलावत ॥३॥

५२.
राग नटनारायन
कटि तट पीत बसन सुदेस।
मनौ नव घन दामिनी तजि रही सहज सुबेस ॥१॥
कनक मनि मेखला राजत सुभग स्यामल अंग।
मनौ हंस अकास पंगति नारि बालक संग ॥२॥
सुभग कटि कछनी सु राजति जलज केसर खंड ।
सूर प्रभु अँग निरखि माधुरि मदन तन पर्‍यौ दंड ॥३॥

५३.
तरुनी निरखी हरि प्रति अंग।
कोउ निरखी नख इंदु भूली, कोउ चरन जुग रंग ॥१॥
कोउ निरखी नूपुर रही थकि, कोउ निरखी जुग जानु।
कोउ निरखी जुग जंघ सोभा करति मन अनुमान ॥२॥
कोउ निरखी कटि पीत कछनी, मेखला रुचिकारि।
कोउ निरखी हृदय नाभि की छबि डार्‍यौ तन मन वारि ॥३॥
रुचिर रोमावली हरि कैं चारु उदर सुदेस।
मनौ अलि स्त्रेनी बिराजति बनी एकैं भेस ॥४॥
रहीं इकटक नारि ठाढी करति बुद्धि बिचार।
सूर आगम कियौ नभ तैं जमुन सूच्छम धार ॥५॥


५४
राजति रोम राजी रेख।
नील घन मनु धूम धारा रही सूच्छम सेष ॥१॥
निरखी सुंदर हृदै पर भृगु पाद परम सुलेख।
मनौ सोभित अभ्र अंतर संभु भूषन बेष ॥२॥
मुक्त माल नछत्र गन सम अर्ध चंद बिसेष।
सजल उज्ज्वल जलद मलयज प्रबल बलिनि अलेख ॥३॥
केकि कच सुर चाप की छबि दसन तडित सुपेख।
सूर प्रभु की निरखि सोभा तजे नैन निमेष ॥४॥

५५.
राग गौरी
हरि प्रति संग नागरि ! निरखी।
दृष्टि रोमावली पर रहि, बनत नाही परखि ॥१॥
कोउ कहति यह काम सरनी, कोउ कहति नहिं जोग।
कोउ कहति अलि बाल पंगति जुरी एक सँजोग ॥२॥
कोउ कहति अहि काम पठयौ, डसै जिनि यह काहु।
स्याम रोमावली की छबि सूर नाहिं निबाहु ॥३॥