श्रीकृष्ण माधुरी - पद १०१ से १०५

१०१.
राग सूही
प्रात समै आवत हरि राजत।
रतन जटित कुंडल सखि, स्त्रवनन,
तिन की किरन सूर तन लाजत ॥१॥
सातौ रासि मेलि द्वादस मैं,
कटि मेखला अलंकृत साजत।
पृथ्वी मथी पिता सो लै कर,
मुख समीप मुरली धुनि बाजत॥२॥
जलधि तात तिहि नाम कंठ के,
तिन के पंख मुकुट सिर भ्राजत।
सूरदास कहै सुनौ गूढ हरि
भगतन भजत, अभगतन भाजत ॥३॥

१०२.
राग नट
हरि तन मोहिनी माई।
अंग अंग अनंग सत सत, बरनि नहिं जाई ॥१॥
कोउ निरखि बिथुरी अलक मुख, अधिक सुख छाई ॥२॥
कोउ निरखि रहि भाल चंदन, एक चित लाई।
कोउ निरखि बिथकी भ्रकुटि पै नैन ठहराई  ॥३॥
कोउ निरखि रहि चारु लोचन, निमिष भरमाई।
सूर प्रभु की निरखि सोभा कहत नहिं आई॥४॥

१०३.
राग गुंड मलार
स्याम सुख रासि, रस रासि भारी।
रुप की रासि, गुन रासि, जोबन रासि,
थकित भइँ निरखि नव तरुन नारी ॥१॥
सील की रासि, जस रासि, आनँद रासि,
नील नव जलद छबि बरन कारी।
दया की रासि, विद्या रासि, बल रासि,
निरदयाराति दनु कुल प्रहारी ॥२॥
चतुरई रासि, छल रासि, कल रासि, हरि
भजै जिहि हेत तिहि दैनहारी।
सूर प्रभु स्याम सुख धाम पूरन काम
बसन कटि पीत मुख मुरलि धारी ॥३॥

१०४.
राग बिहागरौ
सुंदर बोलत आवत बैन।
ना जानौ तिहि समै सखी री, सब तन स्त्रवन कि नैन ॥१॥
रोम रोम मैं सब्द सुरति की, नख सिख लौं चख ऐन।
इते मान बानी चंचलता सुनी न समुझी सैन ॥२॥
तब तकि जकि ह्वै रही चित्र सी, पल न लगत चित चैन।
सुनौ सूर यह साँच कि संभ्रम, सुपन किधौं दिठ रैन ॥३॥

१०५.
राग मलार
नैना ( माई ) भूलैं अनत न जात।
देखि सखी ! सोभा जु बनी है मोहन के मुसुकात ॥१॥
दाडिम दसन निकट नासा सुक, चौंच चलाइ न खात।
मनु रतिनाथ हाथ भ्रुकुटी धनु, तिहि अवलोकि डरात ॥२॥
बदन प्रभामय, चंचल लोचन, आनँद उर न समात।
मानौ भौंहे जुवा रथ जोते, ससि नचवत मृग मात ॥३॥
कुंचित केस, अधर धुनि मुरली सूरदास सुरसात।
मनौ कमल पहँ कोकिल कूजत, अलिगन उपर उडात ॥४॥