वेदांत काव्यलहरी - आत्मभजन

पद चाल --- [नियम पाळावे]

चालवी सकला । त्या भजे आत्मरामाला ॥ध्रु०॥
चाल :--- सकलेंद्रिय जो ह्रदयीं राहुनी । चेष्टवितो अविरत दिनरजनी ।
ऐशा दीन दयाळा सोडुनी । भजशि कोणाला ॥१॥
भूत प्रेतवेताळ देवता । दगड धातु मूर्तीस पूजितां ।
सांग तुला रे लाभ कोणता । आजवरि झाला ॥२॥
श्वाशि कुणाचें गाशि कुणाला । प्रभूद्रोह हा नच कां झाला ।
देह जयाचे सत्तें जगला । त्यास विस्मरला ॥३॥
शुभाशुभादिक कर्में जितुकीं । आचरशी स्वाभाविक तितुर्की ॥
ह्रदयस्थाला अर्पुनि टाकी । सोडुनि “मी” ला ॥४॥