गोलाकार शशीचा, मोहक चाळाच हस्तिशुंडेचा ॥
वेलीची लगट, तसा नेत्रीचा द्दष्टिपात हरिणीचा ॥१॥
हळुवार स्पर्श नाजुक वायूचा, नागमोड नागिणीची ॥
प्रखरपणा सूर्याचा, शीतलता सुखद चंद्रकिरणाची ॥२॥
गुलमोहोर फुलांचा सुंदर तो नवबहार झोकाचा ॥
द्राक्षाची मादकता, नटवेपण डौल मयूर पक्षाचा ॥३॥
आयस्कांतिल चुंबकपण, मधुंतिल माधुरी तसे जाणा ॥
ढोंगीपणा बकाचा, अश्वाचा तेवि एकनिष्ठपणा ॥४॥
पाझरणें ह्रदयाचा जिव्हाळा धर्म चंद्रकेतूचा ॥
काठिण्य हिरकणीचें, कोमलता गूण कमलपुष्पाचा ॥५॥
लज्जा लाजाळूची, शुक, मधुरव, कलकलाट चिमण्यांचा ॥
विश्वासघातकीपण सर्पाचा, मृदुपणा सुकुसुमांचा ॥६॥
भित्रेपणा सशांचा, ढग अश्रूपात, भ्रमर चांचल्य ॥
पूर्व दिशेची हंसरी अरुण छटा जेवि हास्यमांगल्या ॥७॥
कूजन कबूतराचें, चातक आतूरता, समुद्राची ॥
घेउनि अराम्याता, विधि घडवी मूर्ती सुरम्य ललनेची ॥८॥
लय, विक्षेप, कषाया मिसळुनिया आणखी रसास्वाद ॥
स्त्रीविघ्न विधी निर्मी योग्याचें तप करावया बाद ॥९॥
मांस, रुधिर, अस्थीची, कफ, श्लेष्माची जिवंत स्त्री पुतळी ॥
विविध मसाल्याचें हें मिश्रण, तापस कठोर मन वितळी ॥१०॥
असतां अवघड, नसतां अडचण, स्त्री जात शुद्ध मायावी ॥
अष्टगुणें काम जिचा जणु प्रकृती अष्टधाच जाणावी ॥११॥