अंगडया टोपडयानं पेठ करिती झगा झगा
माझा ग बाळ तान माझा चिल्लाळ टोपीजोगा ।
कावळा कुरु कुरु त्येचा प्रचीव तुमी ऐका
बंदूजी पावईना दारी बोलल्या बाईयीका ।
हातात गोट तोडे जव्या दोव्याला नाही जागा
माझी तू बाळाबाई थोरा घरी दिली सांगा ।
हातात गोट तोडे जेवेदावे शोभा देती
लेनं तुझं गुजराती ।
माहेर मला झालं एका महिन्यात दोन
बोलल्या सया नारी अशा श्रीमंत ह्या कोन ।
सुतार कारागिरी गवंडी बसती भिंतीवरी
माझीया बंधुजीची कंठी लोळती छातीवरी ।
सुतार कारागिरी लाव तुळई तासाला
माझीया बंधुजीला करा ढिलाजी बसायला ।
माझ्या अंगणात कुणी सांडीला चुना कात
माझ्या बंधुजीचं गेलं मैतर पान खात ।
कुस्तीच्या फडावरी भल्या भल्यांच्या खाली माना
तुला बंधुजी सांगू किती विडा उचल पैलवाना ।
देवाच्या देवळात तिथ कशाची गर्दी झाली
माझीया बंधुजींनी गुंड छातीच्या वर नेली ।
लाडक्या लेकीचं नांव ठेवीलं हिरा तारा
तिला सोसना ऊनवारा ।
लाडकी म्हणूं लेक दिली सातार्‍या धरतीला
हत्ती राधाच्या वरातीला ।
लाडकी म्हणूं लेक बिजवराला ग देवूं नका
पैसा लेकीचा घेवूं नका धनी दोशाला होवूं नका ।
माया बहिणीला मागणं सारं दागीन जडावाचं
बंधुनी केली बोली गावजेवाण लाडवाचं ।
लोकाच्या लगनांत माझं धुरानं भरलं डोळं
बंधुच्या लगनांत जरी पाताळ पायघोळ ।
माहेरीच्या मळ्यात ग पुंडया ऊंसानं केली मात
माझीया बंधुजीच्या आली दौलत हातात ।
ईनाम म्हणूं गाव नाही येवढया जवाराला
आडव्या पाटाचं पाणी माझ्या माहेरच्या शिवाराला ।
सांगूनी धाडती बंधु माझ्या ग थोरल्याला
साज मागीती डोरल्याला ।
बंधु व्याही करु गेली तको भिऊंस करणीला
वीस पुतळ्या अन्‌ सरी तुझ्या घालीन हरणीला ।
पाच दुरडया रुकवत सहावी तुपाची केळी दिली
बहिण भावाची विहीण झाली ।