श्री स्वामी समर्थ - मोक्षाचिया वाटेवरी

मोक्षाचिया वाटेवरी
भेटे संतमेळा
मुखी नाम समर्थांचे भजनी रंगला

वटवृक्षाखाली आहे
माय समाधिस्त
टेकवूनी मस्तक हे धन्य होती भक्त

आस लागे देई आता
दर्शन कृपाळा
मोक्षाचिया वाटेवरी भेटे भक्तमेळा

कृपासिंधू दीनबंधू
पतितपावन
आशीर्वाद द्यावा आता दत्त दयाघना

स्वामीनाथ योगेश्वर
भक्तांचा जिव्हाळा
मोक्षाचिया वाटेवरी भेटे भक्त मेळा

भक्तीची ही गंगा वाहे
येथे निरंतर
अभयाचे वरदान देई विश्वंभर

चरणांशी लोटांगण
समर्थ दयाळा
भक्तिचिया वाटेवरी अमृत सोहळा