श्री स्वामी समर्थ - वंदना

जनहितकारक साधुत्वाच्या
स्वामी जगदिशा
विनम्रभावे तुला वंदना
करितो परमेशा

ब्रम्हदेव तू, तू गीतार्णव
उदात्त मंगल तूच सत्यशिव
मानवतेचे समुचित वैभव
स्वर्ग नांदतो तव पद कमली
पुलकित दाहि दिशा
विनम्रभावे तुला वंदना
करितो परमेशा

तू विश्वात्मक, सर्वज्ञच तू
समभावाचा प्रेरक हेतू
बंधुत्वाचा अभेद्य सेतू
यशोदीप तू असशी समर्था
मुक्तिची आशा
विनम्रभावे तुला वंदना
करितो परमेशा

माय, तात, तू, तूच विसावा
हाच जीवनी अमोल ठेवा
सदा घडावी तूझीच सेवा
कृपादृष्टि तव नित्य असू दे
वत्सल करुणेशा
विनम्रभावे तुला वंदना
करितो परमेशा