स्वबोधबुद्धिदं चैव शत्रूणां च क्षयंकरम् । द्रव्यलाभं धनं सौख्यं स्वपाके बुधगे सदा ॥१॥
हेमाम्बरे भवेल्लब्धिर्विदेशगमनं भवेत् । बुधस्यान्तर्गते जीवे धनधान्यसुखं भवेत् ॥२॥
बुधमध्ये यदा शुक्रो भवत्येव सुखागमः । धनधान्यसमृद्धं स्याद्वहुसौख्यं करोति च ॥३॥
बुधसन्ध्या तु मध्ये स्यात्सौरपाको यदा भवेत् । तदा राजा भवेन्मानसुखसन्तानकारकः ॥४॥
वातपित्तकृता पीडा हानिकारी नरो भवेत् । पाककाले बुधस्यापि यदा अन्तरतो रविः ॥५॥
देहपीडा च उद्वेगः कलहश्च गृहे भवेत् । अत्यंतहानिकारी च बुधमध्ये तु चन्द्रमाः ॥६॥
अग्निदाहं ज्वरं तीव्रं भवेद्रक्तविकारकम् । शत्रुघातरुजं चैव बुधमध्ये कुजे सदा ॥७॥