अथातः संप्रवक्ष्यामि ग्रहस्योपदशाफलम् ।
सौम्यक्रूरविभिन्नस्य दिनचर्यादिसंमतम् ॥१॥
आदौ रव्युपदशाफलम् ।
ज्वरः शिरोर्तिः पीडा च कलिरुद्वेगकारकः । विग्रहश्च विवादश्च सूर्ये स्वोपदशां गते ॥२॥
धननाशोदरे रोगं कुर्यात्पामां चतुष्पदात् । क्षीरं स्नेहं विना भुङ्के चन्द्रः स्वोपदशां गतः ॥३॥
राज्ञो भयं विकारश्चोपद्रवं रिपुविग्रहः । कुधान्यभोजनं सूर्ये भौमस्योपदशाफलम् ॥४॥
वातश्लेष्मं शत्रुभयं तीक्ष्णं क्षीरं कुभोजनम् । राजपीडा धने हानीराहावुपदशां गते ॥५॥
हेमाम्बरजयैर्वृद्धिः शत्रुनाशं महासुखम् । मिष्टान्नभोजनं सूर्ये शनेरुपदशा यदि ॥६॥
नृपपूजा धनं कीर्तिर्विद्याबन्धुसमागमः । भोजनं मधुरान्नस्य रवौ ज्ञोपदशांगते ॥७॥
दैन्यं परान्नभोजी स्याद्राजपीड महद्भयम् । शत्रुद्वेषोपदशायां चरेत्केतू रवेर्यदि ॥८॥
सुखवृद्धिसमानानि धनलाभो महोत्सवः । स्त्रीविलासः सदा सौख्यं रविः सितदशां गतः ॥९॥