विविधविषयपर पदे - ब्राह्मण

११८३
( चाल-साधुसंतां० )
ब्राह्मणाचा महिमा वर्णूं काय । नारायणे वंदिले ज्याचे पाय ॥१॥
मूखी अखंड वेदउच्चार । चरणी राहती निरंतर ॥२॥
आशीर्वादे स्वानंदसुख देती । शापे करुनी त्रैलोक्य कांपवीती ॥३॥
सकाळांसी पुज्य हे ब्राह्मण । रामदास वंदितो त्यांचे चरण ॥४॥

११८४.
( राग-मारु, ताल-धुमाळी, चाल-हित गेले रे० )
सोवळे कोणते रे । ब्राह्मणा ओवळे कोणते रे ॥ध्रु०॥
विटाळे उपजला विटाळे वाढला । विटाळेंचि मेला सावकाश ॥१॥
हाडामासाच्या सगट मोळ्या । पाणिये सोंवळ्या होती कैशा ॥२॥
देवाकडे मन लागतां उन्मन । सोंवळा ब्राह्मण तोचि एक ॥३॥