५५१ .
भवव्यथेसी औषध । रामनाम हे प्रसिद्ध ॥१॥
हिंडणे न लगे रानोरान । पथ्येविण मुक्त होणे ॥२॥
रामीरामदास म्हणे । मज प्रचीत आली येणे ॥३॥
५५२ .
द्रव्य दारा जनी कदा नव्हे धणी । तैसे नाम वाणी असो द्यावे ॥१॥
रात्रंदिवस द्रव्यदारेचे चिंतन । तैसे लावी मन राघवासी ॥२॥
राघवासी मन लावितां आनंद । तेणे तुटे खेद संसारीचा ॥३॥
संसारीचा खेद संसारिका होय । जया नाही सोय राघवाची ॥४॥
राघवाची सोय पूर्व पुण्ये होय । अंतीचा उपाय दास म्हणे ॥५॥
५५३ .
बैसेना ते कां हो श्रीरामा हे मन । ऐका त्याचा गुण सांगतो मी ॥१॥
कुकर्मी जन्मीचा पापाचा पर्वत । त्याचे कैसे चित्त वोळे नामी ॥२॥
रोगिया पक्वान्न आवडेना जैसे । पापियास तैसे रामनाम ॥३॥
रामनामनिष्ठा बैसेना हळुवटा । करंट्यासी ताठा अविद्येचा ॥४॥
रामदास म्हणे सुकृतावांचोनी । रामनामी मन स्थिरावेना ॥५॥
५५४ .
मुक्तपणे करी नामाचा अव्हेरु । तरी तो गव्हारु मुक्त नव्हे ॥१॥
मुक्त नव्हे काय स्वये शूलपाणी । रामनाम वाणी उच्चारितो ॥२॥
उच्चारितो शिव तेथे किती जीव । बापुडे मानव देहधारी ॥३॥
देहधारी नर धन्य तो साचार । वाचे निरंतर रामनाम ॥४॥
रामनाम वाचे रुप अभ्यंतरी । धन्य तो संसारी दास म्हणे ॥५॥
५५५ .
रामनामेविण कांही । अंती सोडविते नाही ॥ध्रु०॥
थोर थोर योगेश्वर । अथवा प्रपंची इतर ॥१॥
थोरपणे धरिती ताठा । तरि तो नागवला करं‍टा ॥२॥
बहुत पूजिली दैवते । योगयागे नाना मते ॥३॥
धोती पोती आणि भुजंगी । लोली कर्म करिती योगी ॥४॥
विनवी रामीरामदास । नाना साधन सायास ॥५॥
५५६ .
आत्मज्ञानी आहे भला । आणि संशय उठिला ॥१॥
त्यास नामचि कारण । नामे शोकनिवारण ॥२॥
नाना दोष केले जनी । अनुताप आला मनी ॥३॥
रामीरामदास म्हणे । जया स्वहित करणे ॥४॥
५५७ .
कलि पातकाचा निधि । एक मोठी कार्यसिद्धि ॥१॥
रामनागाच्या गजरे । कैवल्यचि एकसरे ॥२॥
नाम स्मरतां वैखरी । आळस न करावा चतुरी ॥३॥
नामामृत संजीवनी । मृत्यु निरसिला सज्जनी ॥४॥
रामीरामदास म्हणे । अनुभवाची हे खुण ॥५॥
५५८ .
आरंभी वंदीन आयोध्येचा राजा । भक्तांचिया काजा पावतसे ॥१॥
पावतसे महा संकटी निर्वाणी । रामनाम वाणी उच्चारितां ॥२॥
उच्चारितां राम होय पापक्षय । पुण्याचा निश्चय पुण्यभूमी ॥३॥
पुण्यभूमि पुण्यवंतांसी आठवे । पापिया नाठवे कांही केल्या ॥४॥
कांही केल्या तुझे मन पालटेना । दास म्हणे जनां सावधान ॥५॥
५५९ .
सकळ साधनांचे फळ । रामनामचि केवळ ॥१॥
जप तप अनुष्ठान । अंती नामचि प्रमाण ॥२॥
नाना मंत्र यंत्रावळी । सोडवीना अंतकाळी ॥३॥
महापातकी पतित । नामे तारिले अनंत ॥४॥
नाम साराचेही सार । नाम सकळांसी आधार ॥५॥
दास म्हणे सांगो किती । नामेंविण नाही गती ॥६॥
५६० .
सोडी वाउगी वाचाळी । ऐक रामनामावळी ॥१॥
प्रेमे सोड देहबुद्धि । मांडी श्रवणी समाधि ॥२॥
रामीरामदास म्हणे । ऐसे आपुलेचि जाण ॥३॥