प्रथमांशुः - देवकोत्थापनम्

तत्र कर्ता देशकालौ स्मृत्वा अस्य कुमारस्य कृतमौंजीबंधनांगस्थापितदेवतानामुत्थापनं मंडपोद्वासनं पुण्याहवाचनं च करिष्ये आदौ निर्विघ्नतासिद्ध्यर्थं गणपतिपूजनं करिष्ये इति संकल्प्य गणेशं संपूज्य स्थापितदेवतानां पूजां कृत्वा - यांतु देवगणाः सर्वे पूजामादाय पार्थिवीम् । इष्टकामप्रसिद्ध्यर्थं पुनरागमनाय च ॥ इति विसृज्य मंडपांते तैलाभ्यंगोद्वर्तनोष्णोदकस्नानानि कारयित्वा वेष्टनसूत्रमुन्मुच्य स्वस्तिवाचनं कुर्यात् । तत्र - अस्य कुमारस्य कृतमौंजीबंधनाख्यस्य कर्मणः पुण्याहमिति विशेषः । शेषं वक्ष्यमाणविवाहवत् ॥ इति कृत्यदिवाकरे देवकोत्थापनम् ॥