प्रथमांशुः - षष्ठीपूजनम्

पंचमे षष्ठे वा दिवसे रात्रेः प्रथमयामे पिता सुस्नातास्तिलकं धृत्वा आचम्य देवतादीन्नमस्कृत्य देशकालौ संकीर्त्य ममास्य समातृकस्य शिशोः सर्वारिष्टशांत्यायुरारोग्यसिद्ध्यर्थं विघ्नेशस्य जन्मदाजीवंतिकास्कंदराकानुमतिसिनीवालीकुहूवातघ्नी शिशुरक्षिणी षष्ठीनां पूजां करिष्ये । इति संकल्प्य कलशं विधिना संस्थाप्य तत्र पूर्णपात्रोपरि वस्त्रेऽष्टदलं कृत्वा तत्र प्रतिमासु पूगीफलेष्वक्षतपुंजेषु वा देवता आवाहयेत् । यथा - गणेशाय नमः गणेशमावाहयामि जन्मदायै० जन्मदामा० । जीवंतिकायै० जीवंतिकामा० । शस्त्रगर्भा भगवत्यै० शस्त्रगर्भाभगवतीमा० । स्कंदाय० स्कंदमा० । राकायै० राकामा० । अनुमत्यै० अनुमतीमा० । सिनीवाल्यै० सिनीवालीमा० । कुह्नै न० कुहूमा० । वातघ्न्यै० वातघ्नीमा० । खड्गे - शिशुरक्षिण्यै० शिशुरक्षिणीमा० । कुड्ये लिखितां षष्ठीं षष्ठ्यै देव्यै नमः षष्ठीदेवीमावाहयामि स्थापयामि इति चावाह्य प्रतिष्ठाप्य विघ्नेशाद्यावाहितदेवताभ्यो नमः इति नाममंत्रेण षोडशोपचारैः संपूज्य क्षेत्रस्याधिपते देवि सर्वारिष्टविनाशिनि । बलिं गृहाण मे रक्ष क्षेत्रं सूतीं च बालकम् ॥ इति मंत्रेण माषभक्तादि बलिं सोपस्करं दत्त्वा प्रार्थयेदेवं - जननी सर्वभूतानां बालानां च विशेषतः । नारायणीस्वरुपेण बालं मे रक्ष सर्वदा ॥ भूतप्रेतपिशाचेभ्यो डाकिनी योगिनीषु च । मातेव रक्ष बालं मे श्वापदे पन्नगेषु च ॥ गौरीपुत्रो यथा स्कंदः शिशुत्वे रक्षितः पुरा । तथा ममाप्ययं बालः षष्ठिके रक्ष ते नमः ॥ आवाहनं न जानामि न जा० इति प्रार्थ्य यस्यस्मृत्येति पूजां समाप्य पूजितदेवताप्रीत्यर्थं ब्राह्मणेभ्यो यथाचारं तांबूलदक्षिणादि दद्यात् । जननाशौचे पक्कान्नभिन्नदानादि प्रतिग्रहणे न दोषः ॥ ॥ इति कृत्यदिवाकरे षष्ठीपूजनं ॥