स्थिरधनो रहितः सुजनैर्नरः सुतयुतः प्रमदाविजितो भवेत् ।
अजगतो द्विजराज इतीरितं विभुतयाद्भुतया स्वसुकीर्तिभाक् ॥१॥
स्थिरगर्ति सुमति कमनीयतां कुशलतां हि नृणामुपभोगताम् ।
वृषगतो हिमगुर्भृशमादिशेत्सुकृतितः कृतितश्च सुखानि च ॥२॥
प्रियकरः सुरकर्मयुतो नरः सुरतसौख्यभरो युवतिप्रियः ।
मिथुनराशिगतो हिमगुर्भवेत्सुजनताजनताकृतगौरवः ॥३॥
श्रुतकलावलनिर्मलवृत्तयः कुसुमगन्धजलाशयकेलयः ।
किल नरास्तु कुलीरगते विधौ वसुमतीसुमतीप्सितलब्धयः ॥४॥
अचलकाननयानमनोरथं गृहकलिं विकलोदरपीडनम् ।
द्विजपतिर्मृगराजगतो नृणां वितनुते तनुते यशहीनताम् ॥५॥
युवतिगे शशिनि प्रमदाजनः प्रबलकेलिविलासकुतूहलैः ।
विमलशीलसुताजननोत्सवैः सुविधिना विधिना सहितः पुमान् ॥६॥
वृषतुरङ्गमविक्रयान्क्रये द्विजसुरार्चनदानमतिः पुमान् ।
शशिनि तौलिगते बहुदारभाग्विभवसंभवसंचितविक्रमः ॥७॥
शशधरे हि सरीसृपगे नरो नृपदुरोदरजातधनक्षयः ।
कलिरुचिर्विबलं खलमानसं कृशमनाः शमनापहतो भवेत् ॥८॥
बहुकलाकुशलः किल गीतवान्विमलताकलितः सरलोक्तिभाक् ।
शशिधरे हि धनुर्धरगे नरो धनकरो न करोति बहुव्ययम् ॥९॥
कलितशीतभयः किल गीतवित्तनुरुपा सहितो मदनातुरः ।
निजकुलोत्तमवित्तकरः परं हिमकरे मकरे पुरुषो भवेत् ॥१०॥
अलसतासहितोऽन्यसुतप्रियः कुशलताकलितोऽतिविचक्षणः ।
कलशगामिनि शीतकरे नरः प्रशमितोशमितोरुरिपुत्रजात् ॥११॥
शशिनि मीनगते विजितेन्दियो बहुगुणः कुशलोऽनिललालसः ।
विमलधीः किल शास्त्रकलादरान्नचलताचलताकलितो नरः ॥१२॥