लग्नगते पञ्चमपे प्रसिद्धस्तोकतनयपरिकलितम् ।
शास्त्रविदं वेदविदं सुकर्मनिरतं तथा कुरुते ॥१॥
पञ्चमपतिर्धनस्थे क्रूरे खेचरे धनोञ्झितं कुरुते ।
गीतादिकलाकलितं कष्टभुजं स्थानकप्रचुरम् ॥२॥
तनयपतिः सहजगतः समधुरवाच्यं बन्धुजने सुविदितम् ।
कुरुते सुतास्तदीयाः परिपालयन्ति तद्वन्धून् ॥३॥
सुतपः पातालगतः पितृकर्मणि रतं प्रपालितं पित्रा ।
जननीभक्तिं कुरुते क्रूरैस्तु विरोधिनं पितृभिः ॥४॥
तनयगतस्तनयपतिर्मतिमन्तं मानितवचनं कुरुते ।
सुतकलितं प्रकटजनविख्यातं मानवं कुरुते ॥५॥
पञ्चमपतिश्च षष्ठे शत्रुयुतं मानवं मानहीनं च ।
रोगयुतं धनरहितं क्रूरः खचरः करोति नरम् ॥६॥
तनयपतौ सप्तमगे स्वसुताः सुभगाश्च देवगुरुभक्ताः ।
प्रियवादिनी सुशीला नरस्य ननु जायते दयिता ॥७॥
सुतपे निधनगृहस्थे कटुवाङ निःस्त्रियो यदा भवति ।
चण्डाः शब्दा व्यङ्गी सहजास्तनया भवन्ति तथा ॥८॥
सुकृतगतस्तनयपतिः सुबोधविद्याकविः सुगीतज्ञः ।
नृपपूजितं सुरुपं नाटकरसिकं नरं कुरुते ॥९॥
सुतपतिरम्बरलीनो नृपकर्मणां नृपात् कलितभावम् ।
सत्कर्मरतं प्रवरं जननीसुखकृत्सुतं कुरुते ॥१०॥
सुतनाथे लाभस्थे शूरः सुतवान् सत्यकृतासङ्गी ।
गीतादिसुकलाकलितो नृपभाजो जायते जातः ॥११॥
पञ्चमपे द्वादशगे क्रूरे सुतरहितः शुभैः सुसुतः ।
सुतसंतापपरः स्याद्विदेशगमनो भवेन्मनुजः ॥१२॥