आर्द्राद्यं विलिखेच्चक्रं मृगान्तं च त्रिनाडिकम् । भुजङ्गसदृशाकारं मध्ये मूलं प्रतिष्ठितम् ॥१॥
यद्दिने एकनाडिस्थाश्चन्द्रनामर्क्षभास्कराः । तद्दिनं वर्जयेत्तस्य विवादे विग्रहे रणे ॥२॥
रोगिणो जन्मऋक्षस्य एकनाड्यां यदा शशी । तदा पीडा विजानीयादष्टप्राहरकी ध्रुवम् ॥३॥
रोगिणो जन्मऋक्षस्य एकनाड्यां यदा रविः । यावदृक्षं भवेद्भोग्यं तावत्पीडां विनिर्दिशेत् ॥४॥
रोगिणो जन्मऋक्षस्य एकनाड्यां यदा भवेत् ॥ जन्मऋक्षं रविश्चन्द्रस्तदा मृत्युं समादिशेत् ॥५॥
जन्मऋक्षं रविश्चन्द्रो भवेद्यादि कथञ्चन । अन्यास्त्वन्यासु नाडीषु तदा नीरोगिता भवेत् ॥६॥