तुझे लोचन
भा.रा.तांबे यांच्या कविता अत्यंत हळुवार असून त्या मनाला भिडतात
अगाध दुर्मिळ जनीं दिसे मज कांहिं तुझ्या लोचनीं ध्रु०
या डोळ्यांच्या खिडक्यांभीतरि
अफाट अनुपम दिसे माधुरी,
प्रिये जिवलगे, काळिज त्यावरि
टाकिन कुरवंडुनी. १
अथांग भरला अपार सागर,
हेलकावतो अगाध सुंदर,
नाचति रविकर जललहरींवर,
कांपे मन पाहुनी. २
अफाट निर्मल आभाळांतुनि
तारे डौलें निघति पलटणी
तालसुरावर नियमित चरणीं
जणुं तंबुर ऐकुनी. ३
मूर्तिमंत जणुं रागरागिणी
तन्मय झाल्या गोड गायनीं
नाग, हरिण, सुरतरुणि, यक्षिणी
डुलति सखे, परिसुनी. ४
मदनाचा कुणी तरुणि पाळणा
हलवी गाउनि दिव्य गायना
जादूची का ही गे रचना
कीं भासचि हा मनीं ? ५
N/A
कवी - भा. रा. तांबे
जाति - सृष्टिलता
राग - बहार
ठिकाण - अजमेर
दिनांक - ८ फेब्रुवारी १९२२
Last Updated : October 11, 2012

TOP