श्रीकालटिक्षेत्रे श्रीशारदादशकम् - करवाणि वाणि किं वा जगति प...

करवाणि वाणि किं वा जगति प्रचयाय धर्ममार्गस्य ।
कथयाशु तत्करोम्यहमहर्निशं तत्र मा कृथा विशयम् ॥१॥

गणनां विधाय मत्कृतपापानां किं धृताक्षमालिकया ।
तान्ताद्याप्यसमाप्तेर्निश्चलतां पाणिपङ्कजे धत्से ॥२॥

विविधाशया मदीयं निकटं दूराज्जनाः समायान्ति ।
तेषां तस्याः कथमिव पूरणमहमम्ब सत्वरं कुर्याम् ॥३॥

गतिजितमरालगर्वां मतिदानधुरन्धरां प्रणम्रॆभ्यः ।
यतिनाथसेवितपदामतिभक्त्या नौमि शारदां सदयाम् ॥४॥

जगदम्बां नगतनुजाधवसहजां जातरूपतनुवल्लीम् ।
नीलेन्दीवरनयनां बालेन्दुकचां नमामि विधिजायाम् ॥५॥

भारो भारति न स्याद्वसुधायास्तद्वदंब कुरु शीघ्रम् ।
नास्तिकतानास्तिकताकरणात्कारुण्यदुग्धवाराशे ॥६॥

निकटॆवसन्तमनिशं पक्षिणमपि पालयामि करतॊऽहं ।
किमु भक्तियुक्तलॊकानिति बॊधार्थं करॆ शुकं धत्से ॥७॥

शृङ्गाद्रिस्थितजनतामनेकरोगैरुपद्रुतां वाणि ।
विनिवार्य सकलरोगान्पालय करुणार्द्रदृष्टिपातेन ॥८॥

मद्विरहादतिभीतान्मदेकशरणानतीव दुःखार्तान् ।
मयि यदि करुणा तव भो पालय शृङ्गाद्रिवासिनॊ लोकान् ॥९॥

सदनमहेतुकृपाया रदनविनिर्धूतकुन्दगर्वालिम् ।
मदनान्तकसहजातां सरसिजभवभामिनीं हृदा कलये ॥१०॥