आसुरविवाह

येथपर्यंत वर्णिलेले प्रकार केवळ ब्राह्मणवर्णापुरतेच मानिले आहेत. यापुढील प्रकारांत इतर वर्णांच्या लोकांचीही उक्तता सांगितली आहे. पाचव्या विवाहप्रकारास ‘ आसुरविवाह ’ अशी संज्ञा असून तो विवाह चारी वर्णांच्या लोकांस करिता येतो. ब्राह्मणवर्गास व क्षत्रियांस या विवाहाची परवानगी आहे; तरी पण तो पहिल्या चार विवाहांप्रमाणे प्रशस्त मानिलेला नाही, यासाठी तो उभयतांनीही करू नये हे विशेष इष्ट आहे. या विवाहात वधू व तिची नातलग मंडळी यांस प्रत्येकी वराने यथाशक्ती द्रव्य द्यावे, व वधूशी स्वच्छंदाने विहार करावा, हे मुख्य तत्त्व आहे. स्वच्छंदाने विहार करणे याचेच नाव चैन; अर्थात या विवाहास उद्युक्त होणार्‍या वधूवरांचे लक्ष धर्माचरणाकडे असावयाचे नाही, व यामुळे या विवाहास गौणता येते हे निराळे सांगणे नको.