भाग्यसमृद्धि नटराजदशकम् - कनकसभागत काञ्चनविग्रह काम...

कनकसभागत काञ्चनविग्रह कामविनिग्रह कान्ततनो
कलिकलिताखिलपापमलापह कृत्तिसमावृतदेह विभो ।
कुवलयसन्निभ रत्नविनिर्मितदिव्यकिरीट शुभाष्टतनो
जय जय हे नटराजपते शिव भाग्यसमृद्धिमुपार्जय मे ॥१॥
करकलितामलशूलभयंकर कालनिरासकपाद विभो
पदकमलागतभक्तजनावनबद्धसुकङ्कण देव विभो ।
शिवनिलयागतभूतिविभूषित दीक्षितपूजित पूज्यतनो
जय जय हे नटराजपते शिव भाग्यसमृद्धिमुपार्जय मे ॥२॥
हर हर शंकर भक्तहृदम्बरवास चिदंबरनाथ विभो
दुरितनिरन्तर दुष्टभयंकर दर्शनशंकर दिव्यतनो ।
दशशतकन्धर शेषहृदन्तर संगररक्षित पार्थगुरो
जय जय हे नटराजपते शिव भाग्यसमृद्धिमुपार्जय मे ॥३॥
शिव शिव शंकर सांब पुरन्दरपूजित सुन्दर मन्त्रनिधे
मुरहरसन्निधिमङ्गलदर्शन मन्त्ररहस्यचिदात्मतनो ।
पुरहरसंहर पापमपाकुरु भीतिमरातिकृतामखिलां
जय जय हे नटराजपते शिव भाग्यसमृद्धिमुपार्जय मे ॥४॥
भुजगविभूषण भूतिविलेपन फालविलोचन लोकतनो
वृषभसुवाहन गांगपयोधर सुन्दरनर्तन सोमतनो ।
सुतधनदायक सौख्यविधायक साधुदयाकर सत्त्वतते
जय जय हे नटराजपते शिव भाग्यसमृद्धिमुपार्जय मे ॥५॥
सकलहृदन्तर चन्द्रकलाधर मन्त्रपराकृतभूतपते
चरणसमर्चन दिव्यगृहागत देववरार्पित भाग्यतनो ।
विधिहरिनारदयक्षसुरासुर भूतकृतस्तुति तुष्टिमते
जय जय हे नटराजपते शिव भाग्यसमृद्धिमुपार्जय मे ॥६॥
गिरितनयार्पित चन्दनचंपक कुंकुमपंकजगन्धतनो
धिमिधिमिधिन्धिमि वादननूपुर पादतलोदित नृत्तगुरो ।
रविकिरणास्तमयागत दैवत दृष्टसुनर्त्तन दक्षतनो
जय जय हे नटराजपते शिव भाग्यसमृद्धिमुपार्जय मे ॥७॥
हिमगिरिजाकरसंग्रहणोदित मोदसुपूर्णसुवर्णतनो
गुहगणनायकगीतगुणार्णव गोपुरसूचित विश्वतनो ।
गुणगणभूषण गोपतिलोचन गोपकुलाधिप मित्रमणे
जय जय हे नटराजपते शिव भाग्यसमृद्धिमुपार्जय मे ॥८॥
डमरुकधारिणमिन्दुकलाधरमिन्द्रपदप्रदमग्निकरं
गुहजननीयुतमातमृगोत्तममर्थिजनाखिलरोगहरम् ।
भज भज मानसविस्मृतिकारकरोगतनूपरिदत्तपदं
जय जय हे नटराजपते शिव भाग्यसमृद्धिमुपार्जय मे ॥९॥
नतजनशंकर पिङ्गजटाधर कण्ठलसद्गर गौरतनो
वरद पतञ्जलिसत्कृतिसन्नुत मृगचरणार्पितपुष्पतते ।
डमरुकवादन बोधितसर्वकलाखिल वेदरहस्यतनो
जय जय हे नटराजपते शिव भाग्यसमृद्धिमुपार्जय मे ॥१०॥
शिवदमनन्तपदान्वितरामसुदीक्षित सत्कवि पद्यमिदं ।
नटनपतेरतितुष्टिकरं बहुभाग्यदमीप्सितसिद्धिकरम्
पठति शृणोति च भक्तियुतो यदि भाग्यसमृद्धिमथो लभते
जय जय हे नटराजपते शिव भाग्यसमृद्धिमुपार्जय मे ॥११॥