गिर्‍हाइकाच्या हातीं दाढी धरविणें

मराठी वाक्संप्रदाय - वाक्यप्रचार

   दुकानदाराला वास्‍तविक आपला माल खपवावयाचा असतो. गिर्‍हाइकानें योग्‍य किंमत देऊन तो न्यावा अशी त्‍याची इच्छा असते. पण कधी कधी आपल्‍याला ती वस्‍तू विकावयाची नाही, निदान इतक्‍या थोड्या किंमतीला द्यावयाची नाही असे तो बाह्यतः म्‍हणतो व गरजूं गिर्‍हाइकाकडून नाहक दाढी धरवितो म्‍हणजे मिंता घेतो. जेव्हा ओढून ताणून चंद्रबळ आणून पर्वा वाटत असूनहि आपणास त्‍या कामाची पर्वा नाही असे कोणी प्रदर्शन करतो तेव्हां ही म्‍हण वापरतात. ‘जावईबोवाला भूक सपाटून लागली होती, पण सासर्‍याने बोलावतांच आखडले. गिर्‍हाइकाच्या हाती नाहक दाढी धरविली तेव्हां दोन तासांनी गेले !’