अद्भुत (अघटित) वार्ता आणि कोल्हें गेलें तीर्था

मराठी वाक्संप्रदाय - वाक्यप्रचार

    कोल्हा हा प्राणी अत्यंत लबाड समजला जातो. तीर्थाच्या ठिकाणीं साधुलोक, सज्जन, चांगल्या प्रवृत्तीचे लोक जातात. लबाड लोकांची प्रवृत्ति तीर्थक्षेत्रीं वगैरे जाण्याची नसते. तेव्हां जर कोणीं एखादा कोल्हा तीर्थास गेला असें सांगितलें तर ती गोष्ट अघटित व असंभाव्य वाटते. अशा गोष्टीवर सहसा कोणी मनुष्य विश्वास ठेवीत नाही. तेव्हां एखादी न घडणारी गोष्ट घडली असें ऐकिलें म्हणजे आश्चर्य वाटून तें व्यक्त करण्याकरितां सदर म्हण वापरतात. अघटित पहा.