नामदेवाचें चरित्र - शिजला तो सर्प काढिलें झां...

शिजला तो सर्प काढिलें झांकण । पाहे तो सुवर्ण तोंडावरी ॥१॥
सुवर्ण देखोनी सुखी जाहाली मनीं । बाई हरिखोनी सांगे नाम्या ॥२॥
सांगितलें वर्तमान नाम्यापासीं । नामा म्हणे तिसी पाहूं सोनें ॥३॥
सुवर्ण आणुनी ठेवियेलें पुढें । काय केलें वेडे नामा म्हणे ॥४॥
कशासाठी माझ्या स्वामीसी पीडिलें । कांगे कष्टी केलें देवराया ॥५॥
मेळविलें द्विज तया नामयानें । वांटियलें सोनें ब्राम्हाणासी ॥६॥
तेव्हां राजईनें आकांत मांडिला । नामा वेडा केला पांडुरंगें ॥७॥
सुवर्णासारखी वस्तु ते वांटिली । भुली ते घातली नामयासी ॥८॥
नामदेवी तिनें बहु जाच केला । कृपाळु पावला गोंदा म्हणे ॥९॥